15 C
New York
lundi, juin 27, 2022

Èske li fasil pou jere yon relasyon long distans?

Yon relasyon oubyen lanmou long distans se lè 2 patenè ansanm youn p ap viv pre lòt. Anpil fwa sa ki konn lakoz sa se kesyon vwayaj, sèvis militè, elatriye. Redaksyon jounal Passion Info Plus te enterese ak sijè sa, li te entèwoje plizyè koup ki te deside konfye nou kèk bagay sou koze sila.

Vanessa se yon jèn fanm k ap viv Ayiti pandan mennaj li ap viv Matinik. Selon sa Vanessa di nou, sa fè 1 an ak 8 mwa li twouve l nan relasyon long distans ak mennaj li a ki rele Evens.

Si anpil moun konn di yo pa kwè yo ka jere relasyon long distans paske yo ap gen mefyans ki blayi nan mitan yo, Vanessa sou bò pa l fè konnen li menm ak mennaj li jere sa trè byen. Mennaj li Evens nou te kontakte di li menm ak Vanessa fè tout sa ki nesesè pou jere koup la tankou yon koup nòmal.

Sandy ki abite Lali rete kwè 2 moun k ap viv relasyon long distans p ap janm ka alèz menm jan ak 2 moun ki toujou kwaze kote youn nan bra lòt toutan. Pou Sandy ki gen 28 lane, li fè konnen pa gen pyès metòd pou ta fè yon relasyon long distans byen mache.

Si Sandy rete kwè pa gen metòd pou koze relasyon long distans ta byen mache, Evens sou bò pa l te eksplike ki metòd li anplwaye ak mennaj li Vanessa pou fè koup la santi pa gen vid nan mitan yo. Selon sa l di yo fè anpil dyalòg ak Kominikasyon ki baze sou apèl ak videyo epi lè sa posib se fè ti sipriz youn lòt ak konplisite zanmi oubyen fanmi.

Pwogrè Teknoloji a ede relasyon long distans yo byen jere

Béatrice sou bò pa l ap viv Etazini, mari l ap viv Ayiti, yo poko gen pitit. Béatrice nan relasyon long distans depi septanm 2015, 2 lane aprè li ta pral fiyanse epi marye marye an desanm 2018.

Béatrice rete kwè gras ak avanse teknoloji yo sa ede jere relasyon long distans lan paske moun yo toujou pale pandan li dakò teknoloji a pa an mezi rezoud absans fizik moun lan ki afekte dèfwa emosyonèlman koup k ap viv relasyon long distans lan selon sa li revele nou.

Kesyon telefòn ak apèl videyo jwe yon gwo wòl nan koze sa, se rezon Evens nan eksplikasyon li yo te eksplike se metòd li menm ak Vanessa anplwaye pou kenbe relasyon an. Se menm ka a bò kote Béatrice ki marye epi Etazini pandan mesye marye l pa bò isit.

Jere yon relasyon long distans èske li fasil?

Sandy jèn demwazèl ki rete Lali a pa t kache nou pou l di: “Moun lan anba pye w la ou pa gen kontwòl li ou pa ka jere l epi se relasyon long distans pou w ta ka jere”. Repons sa se pou Sandy montre koze jesyon sa pa piti, fòk yon moun gen kè.

Bò kote koup k ap viv relasyon long distans yo repons yo pa t twò fasil pou ta montre sa pa gen twò gwo bagay ladan l pou w jere. Vanessa ki pa bò isit fè konnen li gen anpil bon ak move moman ladan l pandan l konkli pou l di viv lwen moun ou renmen pa janm fasil.

Mennaj li Evens ki Matinik pa t twò diferan tou nan repons li yo. Sitwayen an rete kwè dwe gen anpil lafwa ak pèseverans pou sa fonksyone epi ajoute pou l di 2 moun ki nan relasyon yo dwe kwè anpil epi kreye mwayen pou sa fonksyone.

Béatrice li menm fè konnen relasyon long distans mande anpil konfyans. Ki ta vle di yon koup ki pa pare, ki pa gen Kominikasyon antre yo, p ap ka fè relasyon sa oubyen relasyon an p ap dire. Madan marye sa vante tèt li ak mari l pou l di gen pwogrè ki fèt parapò ak premye ane relasyon yo paske vin gen konfyans youn pou lòt.

Koup ki nan relasyon long distans yo bay plis enpòtans ak sa ki rele konfyans avan tou, yon fason pou fè relasyon an mache pandan yo kominike anpil. Sandy menm jan ak yon pakèt moun toujou rete kwè koze relasyon long distans p ap mache, yo pa nan pratik sa.

Vanessa fè konnen kategori moun sa yo gen chwa yo li pa t vle konseye moun sou chwa ak opinyon yo. Yon lòt bò, mennaj li Evens rete kwè se yon gwo defi koze relasyon long distans ye epi fè konnen si yon moun gen ase konfyans nan tèt li, li pa pè avanti, pa gen anyen ki konplike nan sa.

Béatrice li menm di li p ap kont yon moun ki di l p ap fè relasyon long distans paske moun sa ka gen anpil rezon ke li menm li pa konnen ki ka fè l pa vle rantre nan yon relasyon konsa paske sa mande anpil sakrifis ak efò gen moun ki ka pa deside fè sakrifis sa yo pou yon relasyon.

10 bagay ki ka kenbe yon relasyon

Nan yon rechèch konbine sal redaksyon an te fè pou gade sa k ka fè yon relasyon dire, nou te dekouvri 10 bagay ki ka fè koup yo jere relasyon yo.

Premye bagay la se konfyans lan moun yo temwanye nan atik la. 2-Pa kite plas pou jalouzi mete pye. 3-Pou patenè yo toujou pran nouvèl youn lòt. 4-Apèl videyo. 5-Pou patenè yo rezève tan youn pou lòt. 6-pale de pwojè. 7-Fè sipriz. 8-Voye bèl ti foto. 9-toujou deklare lanmou youn pou lòt. Epi viv vi nou.

*Non moun yo chanje sou demann yo

Related Articles

3 Commentaires

  1. Waww deba sa touche’m
    Mwen trouve’m nan yon sitiyasyon ki vreman konplike
    Mwen ap viv ayiti menaj mwen an ap viv bahamas anviwon 5 ans
    Se yon moun mwen rnmen anpil e menaj mwen an pwouve kel rnmenm tou
    Men li se yon moun ki saj anpil men ki manke afeksyon mwen chéche konprann li, menm lè li anvi’m se selman mwen menm ki la detekte sa (ti jès mwen remake ,vi pase pile pye’m )

    Pandan li ap viv naseau a nou toujou rete konekte
    Chak jou nou pale,si li pral soti menm lem pakonn kote li prale a li dim sa waww
    Men li toujou konn ap fè jalou paske mwen se yon moun ki atiran
    Nou toujou fè bel deba
    Defwa nou fè lanmou nan telf ki pa bon
    Paske lem fin wè pati li mwen konn pa santim ka rete mwen souvan al pase swaf mwen

    Ang ou pap janm bouke sou kè’m

    Koup pam nan rete konekte
    Men mwen gen anpil zanmi ki vlem regle bgy serye avek yo
    E pyem deja mare mwen rnmen menaj mwen an

  2. Mwen retwouve’m nan atik sa,paske Mwen nan relasyon long distans,apèl vidéo ak pataj foto ,pèmèt ou kenbe relasyon an tou,men sa pa janm sifi vrèman ,si ou pa renmen moun nan tout bon épi kwè nan relasyon an li pap dire vrèman..sa Mwen te vle ajouté nou pa mete se ;gen moun ki pi alèz nan relasyon long distans ,mpat janm stab ak moun kem renmen ke map wè chak jou ,sé lè li pa bo kote’m osnon li mankem ,Mwen vin renmen’l plis.sa se Mwen ..mèsi

  3. Mwen retwouve’m nan atik sa,paske Mwen nan relasyon long distans,apèl vidéo ak pataj foto ,pèmèt ou kenbe relasyon an tou,men sa pa janm sifi vrèman ,si ou pa renmen moun nan tout bon épi kwè nan relasyon an li pap dire vrèman..sa Mwen te vle ajouté nou pa mete se ;gen moun ki pi alèz nan relasyon long distans ,mpat janm stab ak moun kem renmen ke map wè chak jou ,sé lè li pa bo kote’m osnon mpa wè’l chak jou ,lè li vin mankem ,Mwen vin renmen’l plis.sa se Mwen ..mèsi

LAISSER UN COMMENTAIRE

S'il vous plaît entrez votre commentaire!
S'il vous plaît entrez votre nom ici

Stay Connected

22,878FansJ'aime
3,368SuiveursSuivre
0AbonnésS'abonner
- Advertisement -spot_img

Latest Articles

Toutes Les Dernières Informations Du Monde Avec Passion Info Plus