Pwomosyon 2013-2017 ak 2014-2018 fin fè estaj pou ministè edikasyon nasyonal depi 2 ane, daprè pwotokol ki te siyen ant ministè a ak ENS. Aprè 10 mwa estaj yo dwe ba yo lèt nominasyon, dosye a rete nan enpas si n ka kwè sa Jean Ronald OLYCÉ ki fè pati gwoup diplome yo fè n konnen.
Malgre ansyen Minis Agénor Cadet te deside redui tan estaj yo pou 7 mwa, sa pa pote twòp fwi. Pwofesè yo ap tann lèt yo depi 2 lane. « Nou mande ak minis Marie Lucie Joseph pou ba nou lèt nominasyon nou nan lide pou n al konble vid ki gen nan Lise yo. » Pawòl Pwofesè istwa Jean Ronald.
« Nou fin fè estaj olye yo ba nou lèt la se nan lari yo lage nou nan fè manifestasyon. Olye yo ba nou lèt la pou n al travay ak pitit moun ki pi mal yo nan Lise yo se gaz ak bal y ap ba nou lè nou pran lari a pou n di nou vle al travay. Nou p ap ale Chili ak Brezil pou n al fini anba pon Tekzas, se malere ak malerèz yo ki te finanse etid nou, nou dwe tounen al fòme pitit yo nan Lise yo. » Se kòlè Berno ANTOINE ki se yon diplome nan syans natirèl ak chimi te lage nan mikwo jounal la.
N ap raple se nan batay pou te jwenn lèt nominasyon sa yo, yo te rive asasinen etidyan Grégory St-Hilaire anndan lakou lekòl nòmal siperyè a. Yon lane aprè, anyen pa fèt pou l jwenn jistis ni pou kamarad li yo jwenn lèt nominasyon y ap reklame depi 2 lane a.
Erickson ALCINÉ dit Erick. www.erick509@gmail.com
