Yon ti detay sou bougonnen kliyan konn genyen lè pri plan konpayi telefòn yo monte
Souvan nou toujou remake pil pale lè konpayi telefòn tankou Natcom oubyen Digicel anonse y ap monte plan minit oubyen entènèt. Konsomatè yo konn kalifye sa de vòlè, toupizi kliyan elatriye. Men, menm konsomatè sa yo pa plenyen anpil konsa pou lè yon mèt kay monte kay li, pou manje ki monte, pou lekòl tou ki monte. Anpil nan yo toujou ret kwè ke se paske lavi chè ki fè bagay yo monte men yo inyore konpayi yo tou.
Nan yon ti ankèt nou mennen nan youn nan 2 konpayi telefòn peyi a genyen, yon sous fè nou konnen konpayi kote l ap travay la konn bezwen 113 jiska 115 goud pou achte dola pou konpayi a ka achte bagay pou fonksyone, sa ki konn pa bon pou yo.
Nan koze endis pri konsomasyon an, gen pwodui varyasyon anyèl yo chanje soti nan 10, 6, elatriye pandan ke pou koze telekominikasyon anpil fwa dola a monte epi pri plan konpayi yo konn toujou rete menm jan.
Nou ka pran kèk egzanp: Si w te konn achte yon sachè espageti 50 goud epi dola ameriken ap monte se rete ou rete ou wè sachè espageti sa vin 55 goud oubyen 60 goud. Epi nou remake pri entènèt ak apèl nan konpayi yo rete menm jan.
Nou panse konpayi yo ta dwe bay plis detay pou eksplike moun yo rezon ki fè yo konn monte pri plan yo, yon fason pou konsomatè yo ka an mezi konprann. Lè sa konsomatè a p ap pran konpayi telefòn lan, moun k ap vann manje a oubyen ki gen lòt biznis kòm vòlè oubyen piyajè, men lè sa nou menm konsomatè ap plis egzije bò kote dirijan nou yo pou fè bagay yo mache byen, pou lavi chè bese, pou moun viv byen epi tankou moun.
