Plizyè dizèn sitwayen te rasanble douvan Konpayi telekominikasyon Digicel nan zòn tijo jodi lendi 18 oktòb 2021 an nan lide pou fòse reponsab Konpayi Maarten Boute ap dirije a retounen sou dezisyon sou koze ogmantasyon frè sèvis moncash la.Yon sit-in ki te pral fòse fini anba gaz lakrimojèn fòs lòd yo.
Nan tèt avni Jan-Pòl II douvan Digicel la te okipe. Pizyè jèn fanm ak gason te deside plante pikèt yo douvan Konpayi blan e wouj la pou mande Maarten Boute retounen sou dezisyon li pran monte frè tranzaksyon sèvis moncash la. Sitwayen yo te tou pwofite mande PDG a pou rache manyòk li nan peyi a. Anplis, plizyè jounalis ki te sou plas pat kache kòlè yo sou ansanm move sèvis Konpayi sa ap remèt na peyi a.
“Kesyon moncash ka se youn nan sèvis majorite popilasyon an itilize paske yon moun ki gen moun an pwovens li pa oblije ale an pwovens pou al pote kòb bay fanmi. Sa se te yon bon sèvis li te ye pou popilasyon an tout moun te konn itilize men w paka leve yon bon maten pou ogmante pri yo a 40 % e panse ou ta sipoze avize kliyantè la. Sèl sa n ap mande se retouen sou desizyon li an ” pou site jounalis repòte Radyo “Zénith” Robeste Dimanche.
Yon lòt bò, jounalis Richardson Bigot ap plenyen sò pa li, li tou pwofite mande tout abòne Konpayi telefòn selilè a leve vwa yo “Tout sitwayen k ap sèvi ak Digicel dwe pou yon rezon yon lòt dwe pran lari a menm yon moun k ap sèvi ak lòt Konpayi dwe leve vwa l paske Digicel ap vòlò minit nou, entènèt nou pa bon, rezo a ap mal fonksyone”. Anpil wòch nan lari a, kawotchou boule, revandikasyon sou revandikasyon marande ak anpil eslogan ,pawòl piman bouk pou te chofe sit-in nan ki pral kraze anba anpil gaz lakrimojèn.
Malgre grèv ilimite sendikalis yo te lanse a , sa pat anpeche kèk sitwayen vin rele nan zòrèy responsab Digicel yo pou tounen soudezisyon ogmantasyon frè moncash yo ki te fiske pou rantre an aplikasyon jodi lendi 18 oktòb 2021 an, sa ki rive fèt nan yon mesaj konpayi a voye bay kliyan li yo.
