Jan nou konnen li an ratman gaz la mete anpil gwo antrepriz komèsyal nan gwo difikilte nan tout dènye jou leve tonbe yo. Sa ki lakoz yo pa ka rive bay popilasyon ayisyen an sèvis. Sa nou rele «Mezon transfè» yo se youn nan sektè ki touche ak pwoblèm sa, ki vin mete anpil fanmi ki gen lespwa sou dyaspora nan gwo difikilte ekonomik.
Depi lansman operasyon « Fèmen Peyi » wikenn pase a, aktivite komès, lekòl, transpò nan kapital pòtoprens la ak anpil lòt vil nan peyi a pa fonksyone. Sa ki vle di biwo transfè yo fèmen pòt tou nan lide pou respekte pawòl sendikalis yo ki vle fòse leta rezoud pwoblèm gaz la. Pandan tan sa, anpil fanmi ap fè fas ak gwo difikilte ekonomik sitou anpil ladan yo ki pa gen lòt espwa aprè yon pwòch oubyen yon fanmi ki nan dyaspora ki pou voye yon ti tchotcho pou yo jwenn mwayen pou ravitaye yo.
Temwanyaj nou rive jwenn bò kot kèk konsène pa rann biwo transfè yo responsab.Men pito, diskou yo ale kont leta ki li menm ta dwe mete tout mwayen nesesè pou fè lavi reprann nan mitan popilasyon an. « Pou biwo transfè yo fonksyone, yo bezwen gaz la tou, paske òdinatè ak lòt materyèl sèvis yo se kouran ki fè yo mache, nou pa ka akize yo», reyaksyon yon jèn ki pat vle bay non li, li gen fanmi nan dyaspora tou ki konn ede li rezoud kèk ti pwoblèm lè moman yo difisil pou li.
Sa ki plis avize yo wè sitiyasyon ekonomik peyi a ki kapab vin plis katastwofik nan jou k ap vini yo si toutfwa bagay la ret konsa. « Yon peyi ki te deja ap fè fas ak yon kriz sosyopolitik san parèy, ki vin wè pwoblèm gaz ki se yon pwodwi tranvèsal jan yo di l la, kote tout aktivite sanse paralize. Se pa sèlman moun ki viv sou kont dyaspora ki frape fò. Anpil sektè ap pran gwo kou tou, pa gen lavi daprè sa n ap gade la. Se tout peyi a ki pran nan viris la », analiz yon jèn etidyan nan Fakilte Syans Moun nan Inivèsite Leta nan ti bat bouch redaksyon an te gen avèk li.
Ensekirite a daprè li se premye faktè ki mete popilasyon an nan tout difikilte l ap fè fas antyèlman.« pèp la pa mande plis, yo jis bezwen sekirite pou yo kapab ale nan aktivite yo. Pèp ayisyen pa ekzijan pase sa, se yon pèp ki nayif, se otorite yo ki pa vle konprann pèp la ».
Biwo transfè yo gen yon enpòtans kapital nan sosyete a. Yo kenbe responsabilite anpil angajman dyaspora ki gen swa yon fanmi oubyen anplwaye yo k ap viv Ayiti. Nan ka envès la, kèk paran isit ki gen pitit yo lòtbò dlo konn itilize menm mwayen sa pou yo voye yon ti degaje pou yo.
Sitiyasyon an ap agrave pi plis, anpil enstitisyon deja anonse fèmen pòt pou kesyon gaz la ki pa sispann fè lago nan aktyalite isit. Lopital piblik, ak prive blije ralanti sou fonksyònman yo. Pa twò lontan sa, RFI, ki se yon radyo entènasyonal ki gen anèks li nan peyi Dayiti, fè konnen y ap oblije kanpe emisyon yo, paske sit yo pa alimante pou kenbe emetè estasyon an nan Boutilye.
Operasyon « fèmen peyi » sektè transpò a te lanse a fini jodi mèkredi 27 oktòb. Men youn nan sendikalis yo ki se Jacques Desroches fè konnen si Leta pa bay yo sa y ap mande a ki se sekirite pou fasilite gaz rive nan ponp yo, 3 novann k ap vini la y ap rebalanse, kidonk,pòt biwo transfè yo riske rete fèmen.
