Ravin Pentad: Passion Info Plus te rankontre atis gwoup “New Wave” lapolis te tire sou yo a

Jan anpil moun konnen, yon patwouy lapolis te tiye pou pi piti twa jèn gason pandan yon jèn gwoup mizikal ki rele “New Wave” t ap choute yon videyo mizik jou ki te 21 septanm pase a nan Nò Aleksi, Ravin Pentad ki debouche sou Lali. Aksyon sa te fè anpil pawòl, atravè anpil medya sa te anime deba yo. Anpil kòmantè te fèt sou zak sila. Se rezon, yon ekip Passion Info Plus t al sou plas 5 jou aprè zak sila pou gen plis detay.

Li te 5 è nan aprèmidi, ekip Passion Info Plus la te koumanse vizit li an depi nan tèt Riyèl Vayan, ale tonbe anndan yon geto ki pote non Site Choun ki se baz gwoup la menm epi rive nan Ravin Pentad ki kole ak baz nèg yo. Ekip la te rann li nan yon estidyo ki nan Ravin Pentad, se nan espas sa nou te rankontre 3 nan 4 atis gwoup la epi prezidan gwoup sa ki se Jean Claude Mirville Exumé ki gen kòm responsabilite kowòdone pou gwoup mizikal la.

Lè nou te rive, atis yo te ap mete vwa pou fè yon mizik omaj pou moun ki te mouri jou swa a pandan videyo a t ap choute a. Se moman sa tou, yo te aksepte ba nou kèk detay.

Pa t gen bon zam daprè prezidan gwoup la

Enfòmasyon ki rive jwenn redaksyon an pa yon sous nou ki gen koneksyon ak katye a, fè nou konnen gwoup mizikal sa te koumanse choute videyo mizik la vè 9 è nan aswè. Mizik sa rele “Arsenal” kote nan sèn videyo a kèk moun ki t ap patisipe te gen fo zam nan men yo, yon fason pou sèn yo ale ak sa k ap dekri nan mizik sila. Se moman sa vè 10 è 30 yo konsa, yon patwouy polis zo reken selon temwanyaj sous sa, soti sou Lali rive nan espas la epi simaye katouch sou moun ki te la epi lakoz moun mouri ak lòt ki soti blese.

Prezidan gwoup la ki t ap pale fè konnen yo pa t gen otorizasyon papye lapolis ki ta ba yo dwa fè videyo oubyen aksepte yo pote fo zam pou videyo a. Men, pi lwen nan deklarasyon li yo, li fè konnen rezon kifè sa pa t nan lide yo se paske yo te jije nan moman an se nan blòk yo videyo a ap monte, yo pa t janm panse yon bagay konsa te ka pwodui.

Saimbert Alens ki gen non atis Outsider, te bay eksplikasyon ki fè yo menm nan gwoup la deside vin ak yon mizik konsa. Selon sa l di, mizik sa se reyalite vi geto a yo menm yo vle fè pase ladan l, se rezon mizik la pote non “Arsenal”. Pou kontinye, Muscadin Mike Mardoche ki gen non atis Mike ajoute pou l di se montre gran piblik la reyalite jan moun ap viv nan geto a kote gen moun si se pa zam yo kenbe, yo p ap viv.

Si kèk moun ap gade vizaj, fason yo abiye pou bay nèg yo etikèt sou rezo a, atis Mike te kontinye pou l di New Wave se yon gwoup rap ki legal, ki anrejistre nòmal tankou tout lòt gwoup, se pa yon gwoup gang, se pa paske yo yon fason pou moun baze sou sa pou jije yo.

Jean Claude Mirvil Exumé menm jan li deklare l anpil lòt kote, refè konnen ke gwoup la pa t gen bon zam nan moman videyo a, se fo zam yo te mete pou monte sèn yo epi kritike lapolis ki pa menm poze kesyon li aji. Responsab la pa vle lonje dwèt pou l di se yon move kout dwèt yo ta fè, tout fwa li swete jistis pou moun ki tonbe yo.

Gen nouvo pwojè nan wout

Reginald Toussaint aka Atis Polo’s rasire moun k ap swiv gwoup yo batay la p ap kanpe, y ap kontinye avanse malgre sa k fin pase yo. Li anonse gen pou pi piti 2 pwojè ki ap kuit nan kizin jistan yo panse pou yon album oubyen mixtape.

3 novanm ki fèt yo, Polo’s fè konnen gwoup la p ap fè okenn aktivite pou respè moun ki mouri yo epi moral yo tou ki pa fin twò bon selon sa l di.

Gen moun ki touche pa bal pandan aksyon an

Pandan aksyon sa te fin fèt la, gen kèk moun tou ki pran bal ki pa grav nan sa repòtè nou te arive wè. Genyen tou se bal ki eflere yo, pami yo yon jèn gason yon katouch flote l zòn kwis li ki te ap obsève lè videyo a ap monte a. Pou kounya li koumanse fè mye aprè li fin panse plizyè fwa.

N ap siyale tou okenn atis gwoup la ki t ap choute videyo a pa gen anyen. Yo te getan chape poul yo pou evite yo viktim.

Yon jou aprè aksyon an, Ravin Pentad te bloke

Zòn lan te bloke yon jou aprè kote sitwayen yo t ap eksprime kòlè yo fas ak sa k pase a. Yo estime se mechanste epi di nèg yo pa t gen bon zam se fo zam. Yo te monte barikad, machin pa pase, kawotchou t ap boule.

Gaz ak katouch te fè kenken

Vè 2 è nan menm jou sa, zòn lan te enpratikab kote wòch ak boutèy t ap tire. Pou riposte lapolis te tire epi bay anpil gaz lakrimojèn pou eseye kalme kòlè sitwayen zòn yo.

Fas ak gaz ki t ap bay la anpil moun te kouri kite kay yo, machin pa t pase deyò sou wout Nò Aleksi a, moun t ap eseye demake espas la tou.

Aksyon sa ki fin pase a gen kèk moun k ap kesyone pou mande ki rezon lapolis tire? Èske se yon operasyon ki te vin mennen? Èske te gen ripòs bò kote estaf ki t ap choute videyo a? Èske se bon oubyen fo zam? Anpil kesyon ki merite bon jan ankèt ki ka bay repons pou retire tout sispisyon nan dosye sa.

Detay sou New Wave

Gwoup sa ki t ap choute videyo a daprè tout detay nou rive jwenn kreye 3 out 2017. Li gen 4 atis ladan l, li baze nan blòk Ravin Pentad nan yon ti lokalite ki pote non “Site Choun”. Gwoup sa gen yon mizik trap ak tout videyo anpil moun ki renmen mizik ka konnen ki rele “I m a loco” ki konn abitye woule sou Tele Sky chèn 32 selon detay yo.