Pandan galon gazolin ak dyezèl ap vann ant 500 a 1000g nan lari selon kote ou ye a, pri gaz pwopàn nan menm sanble pa gen limit nan dènye tan yo tèlman l ap monte.Distribitè yo monte pri galon yo jan yo vle jiska 300g anba bab ak 2 nawè ministè komès alòs konsomatè final yo menm ap plenn.
Pandan tout dènye tan yo, pwodui petwolye yo pa gen yon pri fiks. Se yon veritab gagòt, pa gen okenn kontwòl sou kòman ak sou ki pri distribitè yo vann li. Se sa k fè nan chak ti kwen se moun k ap vann gazolin ak dyezèl ak yon pri ki 2 a 3 fwa plis ke pri li vann nan ponp yo. Kanta pou gaz pwopàn nan menm pri a se galope l ap galope monte.
Nan lide pou konnen kisa ki lakoz pri gaz pwopàn nan ap monte konsa, redaksyon Passion Info Plus la te jwenn ak Myrtil Aritil ki se youn nan sipèvizè adjwen Sodigaz ki fè nou konnen “gen 2 aspè ki fè pri gaz pwopàn nan monte nan peyi a se lè ke dola a monte sou mache chanj lan epi pri gaz la menm monte sou echèl entènasyonal la. Si se pa youn se lòt”. Anplis, monte desann nan pa depann de yon estòk ki poko fin vann vizavi varyasyon sou pri a sou mache entènasyonal la. “Menm si w te genyen l nan estòk la depi l desann sou echèl entènasyonal la ou desann li tou, nou pale selon Konpayi nou ladan l lan” selon Mesye Myrtil.
De (2) mwa pa ko pase pou galon gaz pwopàn nan rete ak menm pri a. Mwa septanm nan nan zòn metwopolitèn nan, galon gaz pwopàn nan te vann 265 goud, pou mwa oktòb la li vann 275 goud.
Gen kote nan depatman Lwès la galon an vann 300g. Nan depatman Sidès la, (1) yon galon gaz pwopàn vann 325 goud, swa 1625 goud pou (5) senk galon. Nan Pòdpè, gen kote ki vann galon an 250g pou n site sa yo sèlman. Sa ki vle di chak Konpayi oubyen distribitè yo depandaman de zòn ou ye a fiske pri pa l anba bab mouche ministè komès ki sanble pa gen nawè pou konstate veritab dezòd sa.
“se yon pwoblèm estriktirèl, Ministè komès pa regile pri yo sou mache a leta pa mete yon pri fiks sou mache a se sa ki lakoz chak moun fiske pri pa yo” pou site anplwaye Konpayi Sodigaz la Ki mande ministè pou pran tout dispozisyon l pou pa kite se distribitè a k ap fiske pri pwodui petwolye yo sou mache a.
Si nou byen konprann si monte gaz pwopàn nan peyi Dayiti depann de monte desann dola a sou mache chanj lan enbyen pri gaz pwopàn nan la fenk kare monte paske chak jou lè nou konsidere goud la ki pa sispann pèdi valè li devan dola a ki preske 100g nan biwo mezon transfè yo.
