Henry Robert Pierre ak Bantou Rose F. Evashnaah marye Samdi 10 Oktòb pase a nan lokalite Gebeau, vil Jeremi. Yon seremoni ki te koumanse 11è pou rive 4è nan yon anbyans kiltirèl.
Fas ak kalite imaj espesyal k ap pataje sou rezo sosyal yo de evènman sa, sal redaksyon nou t al foure je gade. Abiman lokal, kote timoun tankou granmoun epi moun nòs yo te abiye ak rad karabela epi sandal atizanal po kui.
Anpil Moun ap pale de seremoni vodou. Yon pwòch fanmi an fè n konnen: “Lide a se te pou valorize kilti Peyi a, se te lide 2 moun yo. Dam marye a se yon agwonòm, li te fè pati gwoup dans responsab kilti nan depatman an ki se madam Galerne Dupoux, ki kontribiye nan reyisit seremoni an. Epi se la yo twouve timoun pou fè kòtèj la, san bliye envite yo ki te fè efò pou respekte protokòl la”, selon eksplikasyon pwòch la.
Menm fotograf maryaj sa te rantre nan dekò a. Nou te fè yon ti pale ak Almando Etienne, ki se responsab «Mr click studio photo vidéo» prodiksyon ki reyalize seremoni an. Selon sa l di, maryaj sa t ap prepare depi 2 mwa, moun marye yo te deside nan yon rankont pou fè popilasyon an benefisye de maryaj la. Olye yo ale achte wòb ak lòt abiman byen chè yo te prefere bay koutirye ak atizan fè travay la.
Resepsyon an pa t diferan. Ji natirèl, kann kale, mango, anana… Epi manje lokal tankou tontonm, mayi kole ak Zaboka…
2 moun yo di yo kontan reyisit seremoni an. Yo ansanm lontan, lide maryaj sa t ap boujonnen depi plizyè lane. Si n ka kwè pawòl reyalizatè a.
Yon lòt kote, mizik yo te rete lokal pa t gen DJ men pito yon twoup lokal ki te vin chante mizik angaje. Tout nan resepsyon an anbyans lan te kontinye anba chalè mizik kreyòl ak angaje.
N ap raple se 2 prèt katolik ki te selebre maryaj sa, men pa nan yon legliz pito nan yon choukoun ki twouve l lan yon ansyen lakou ki gen yon long istwa kote yo menm afilye l ak epòk esklavaj. Gen plizyè granmoun k ap viv nan lakou sa. Yon maryaj ki sisite anpil reyaksyon nan sosyete a lè nou konnen kouman sa abitye òganize òdinèman.
Erickson ALCINÉ dit Erick. www.erick509@gmail.com
