15 C
New York
samedi, juillet 2, 2022

Fouye telefòn mennaj ou, sansasyon yo pa toujou dous

Fouye telefòn mennaj ou, sansasyon yo pa toujou dous

Envantè Graham Bell te vini ak zouti sila nan lide pou fasilite kominikasyon moun ak moun. Dènye tan yo ak devlopman teknoloji a, telefòn vin gen plis enpòtans nan fonksyònman sosyete yo. Gen moun li fè jwenn opòtinite gen pou lòt li se yon mal nesesè, patène ki pa fin dwat yo ka konfime.

Non sèlman li se yon zouti kominikasyon gen kèk jèn nou te rankontre ki fè nou konnen tou divès wòl li jwe nan lavi yo. “ Li se yon zouti de travay ak rechèch, se ak telefòn lan mwen fè tout sa m gen pou m jere menm relasyon amourez mw. ”,pawòl Karl yon jènn 23 lane. Men li pa sèl moun ki itilize aparèy sila nan sans sa, nou te pale ak yon jèn inivèsitè ki se Françoise: “Ak telefòn lan mwen mete plis nan tèt mw li ede m avanse nan sa m ap aprann. Li se biznis mwen tou li ede m fè lajan menm lè li pa endispansab ”.

Fouye telefòn patenè yo

Depi lontan lòm renmen konnen e yo toujou ap chèche. Malgre risk ki gen nan sa, anpil jèn pa ezite al fouye telefòn moun yo devlope yon relasyon ak yo a.

“ Mwen verifye telefòn mennaj mw men ankachèt, depi m santi gen yon bagay ki pa nòmal. E mwen pa rete anpil, depi gen yon bagay ki atire atansyon m mwen fè foto a pou m li l aprè sou telefòn pa m, sa vrèman enteresan. ”, deklarasyon Alexandra ki gen sèlman 21 lane.

Si atis Pierre Jean di li pa pral fouye telefòn patenè li, tout gason pa ale nan menm sans lan. “ Wi mwen konn fouye telefòn mennaj la, se pa fòseman jalouzi men se yon fason pou m chèche sekirite nan relasyon nou paske tout ti detay konte. Mwen paka nan yon relasyon pou m pa konnen kisa moun lan ap regle, depi w nan relasyon pa gen kesyon vi prive ankò ; sa k ap pase nan vi nou chak regade youn lòt.” Sa se opinyon Guy ki tout fwa gen pwòp taktik li pou twouve mòdpas medam yo.

Gen lòt jènn ki fè jan de aksyon sa men ki pa pran l kòm abitid paske sanble gen enprevi.“ Ou ka ale nan telefòn moun lan akoz kiryozite epi se moman yon fanm ap fou pou nèg la poutan nèg la pa sou sa, fanm sa voye yon mesaj tèt chaje pou li. Ou ka tonbe sou mesaj la epi w pèdi relasyon w pou anyen. Bagay la se dyalòg, kominikasyon ak konpreyansyon. ”, se sa Nadia konfye nou.

Prekosyon pa kapon gen moun ki koupe fache ak pratik sa

Pa gen bon solda san bon defans. Gen yon kategori jèn ki deside favorize prekosyon, rezon yo pataje. “ Non mennaj mwen pa gen dwa al nan telefòn mw « Il est un téléphone portable », si l prive li pa gen dwa sa e malerezman mwen pap bay li dwa sa tou. Telefòn lan gen vi pa l mw gen pa m, li pa dekri m. Se vre nou ansanm men nou chak gen vi pa nou. ”, deklarasyon Rose ak yon vwa ranpli emosyon, li pa fouye tou koz sa je pa wè kè pa tounen.

“Pou evite kas tèt mw pa dakò mennaj mw al li konvèsasyon m. Bagay yo dwe gen limit pou n pa kreye pwoblèm. ”, Rodlin kote pa l fè m sou pozisyon sa pa paske gen bagay l ap kache pito li pridan.

Yon lòt kote nou te rankontre yon gwoup medam nan yon lekòl pwofesyonèl nan kapital la, anbyans la te chofe. “ Li pa gen dwa sa, bagay sa pa fezab pa gen koze konsa afè al gade mesaj kote konfyans lan? ” Pawòl youn nan etidyan sa yo, sou ton l ap pale a li ka fè nenpòt tòg pè li. “ Fouye telefòn fè makak, 2022 nou ye, si w paka avè m lage pye w pa nwi m ”, youn nan gwo koze medam yo lage nan kòlèt nou. Pou m senp, etidyant yo fè nou konnen si y ap regle yon bagay se pa fouye telefòn la k ap fè mesye yo konnen l.

Kisak pouse yon patenè fouye telefòn mennaj li,mari oubyen madanm li ? Aspè sosyolojik kesyon an

Pou n eseye konprann pi lwen pratik sa, nou te chita pale ak Yves Michel Bazile memoran nan sosyoloji nan inivèsite Leta. Daprè li, se kiryozite, jalouzi, mank konfyans ak chanjman konpòtman ki ka plis pouse yon patenè al fouye telefòn mennaj/mari/madanm li.

“Premye aspè a se mank konfyans. Kesyon konfyans lan se li ki primòdyal ”, pawòl sosyològ la. Aksyon sa gen retonbe negatif li, nou wè l chak jou nan reyalite a. Paske apwòch sa yo toujou pote mezantant pafwa vyolans e menm ka kraze relasyon anmoure/anmourez yo.

Si mizik la di si ti kè w pa bon jete w, wi si w soufri maladi kadyak ; rete lwen telefòn moun ou. Telefòn patenè yo preske tounen zonyon depi w pwoche je w l ap fè dlo. Fòk nou raple otorite nan vil « Dubaï » vote yon lwa ki prevwa 3 mwa prizon e plis, ak amann, pou fanm k ap fouye telefòn patenè yo.

Related Articles

LAISSER UN COMMENTAIRE

S'il vous plaît entrez votre commentaire!
S'il vous plaît entrez votre nom ici

Stay Connected

22,878FansJ'aime
3,373SuiveursSuivre
0AbonnésS'abonner
- Advertisement -spot_img

Latest Articles

Toutes Les Dernières Informations Du Monde Avec Passion Info Plus