Lapolis dominikèn arete yon Ayisyen ak tout madanm li apre yo akize yo pran yon mago lajan nan men yon Dominikèn pou boul bòlèt. Selon sa jounal domininen an Listin Diario rapòte , mesyedam yo te fè dam nan kwè si yo ba li 1 415 637 peso l ap genyen nan pwochen tiraj la. Malerezman boul la pat sòti.
Moise Amadis ki gen ti sounon Junior, se yon prezime “Sòsye” ki ap viv nan peyi vwazen an epi ki pran plezi ap pwomèt moun bon boul bòlèt. Se konsa li rive pran preske yon milyon edmi peso nan men yon Dominikèn ak kondisyon se li ki pral genyen nan pwochen tiraj la.
Viktim nan, lapolis pa revele non li, di li te bay Maria Esther Soto Cabrera, madanm Moïse Amadis, yon total 1 415 637 peso aprè li te fin pase yon anganjman ak mari a. Ak espwa se li pral genyen, dam lan te lonje kòb la ba yo men malerezman, anyen pat pase jan viktim lan te panse a.
Nan moman arestasyon swadizan “sòsyè a”, li te eseye kouri antre nan rezidans yon sitwayen, kote yon batay kòmanse ant li ak plizyè fanm ki te la lè li wè polisye yo te vle depoze lapat sou li.
Menm jan an tou, viktim lan akize madanm sòsye a, Soto Cabrera, li fè konnen se limenm ki te resevwa depo bankè a.
Dapre rapò lapolis la, yo te arete moun yo pou vyolasyon Atik 405 Kòd Penal Dominiken an. Pou kounya, yo tou de nan men lajistis pou reponn ak zak yo fè.
Men ta sanble, se pa premye fwa, Moise ap fè sa paske gen plent yo te fè kont li deja pou menm pratik sila a.
