Ansyen depite Dèlma/Taba a Arnel Bélizaire aprè plizyè jou sou kabann lopital, sòti nan silans li pou denonse zak asasinay nèg Maya, Ri Timas ak Sanfil fè sou li nan laprèmidi 30 mas 2022 a. Nan yon nòt ki parèt jodi lendi 18 avril la, ansyen palmantè a di l angaje l pou l retounen nan batay la e tou pwofite remèsye tout estaf lopital ki te resevwa l la pou ba li swen.
“Nèg riyèl Maya touye m, bondye pa resevwa m, li voye m tounen” pou n site militan politik la ki rete rekonesan anvè medsen yo ki te ba li swen aprè atak la.
“Mwen mete vwa m ak tout rès fanmi an poum remèsye tout estaf “Hopital Canapé-vert espeyalman ekip medikal ke Dr Sausthern Pierre te itilize pou te fè mirak, pandan dezè sou yon tab operasyon pou yo te ka retounen mwen sou ti bout tè sa a apre zak asasinay nèg Maya, Ri Timas ak san fil te fè sou mwen nan laprèmidi 30 mas 2022 la”
Ansyen palmantè a pwofite remèsye tou militan ki te akonpaye li yo nan jounen mobilizasyon 30 mas la.
“mwen remèsye chak grenn militan konsekan ki te akonpayem nan jounen lanmou ak rekonsilyasyon ke pitit Desalin ak Pitit Petyon yo te fè pou nou ka al chache rekonsilyasyon, solidarite ak tèt ansanm pami frèn ak sèn k ap soufri nan zòn defavorize yo” pou site Arnel Bélizaire ki fè konnen “se yon obligasyon pou retire peyi a nan twou sèvitè ak esklav zwazo bèk fè yo tyoul restavèk sistèm pouri a, Leta anti pèp sa a foure l la.”
Li kontinye pou di se “nan chimen tèt ansanm, san chire pit nan mitan nou ankò, frè nou, zanmi nou, kanmarad nou Amel Belizaire di nou pa gen okenn fo konplo ni kout mal taye lap kite kraze ti zing linyon sa ki koumanse boujonnnen nan mitan militan konsekan nou yo, pou kanpe sou chimen rekonsilyasyon mas yo, pou nou ka al chache ansanm vrè fòs la pou’n rive mete deyò tout tyoul restavèk sistèm pouri sa a kap toufounen bil pèp ayisyen an depi two lontan”.
Militan an fè apèl ak tout fòs òganizasyon popilè yo pou yo rete lwen lidè k ap mete pwojè yo avan lit peyi a pou yo ka rejenere tèt yo nan zafè politik la.
“N’ap pwofite di tout ansyen fos rezistans 2004, tout manm fòs gran Black, tout Militan angaje Petyonvil, Dèlma, Lasalin, Solèy, Akayè yo, sitwayen konsekan Bèlè ki gen redevans douvan manman pèpetyèl menm jan ak mwen, pa kite okenn lidè ni blofè ki bezwen mete zafè pèsonèl yo avan lit peyi a jis pou yo ka ret vivan politikman”. Poun site ansyen depite a ki mande alye li yo pou kontinye misyon yo a ki se “retire moun bèlè, site solèy, lasalin ak tout rès peyi a k’ap soufri anba grif kriminèl yo pou yo ka tounen viv lakay yo kòm moun”.
Nòt sa pote siyati mèt Caleb Jean Baptiste, Killick Pierre Cemelus, Magalie Lacroix ak ansyen depite a.
N ap raple viktim nan te resevwa 4 bal nan nivo lestomak li, e li deja sibi plizyè operasyon, li pwomèt l ap retounen sou beton an pou kontinye batay bò kote mas defavorize yo.
Kredi foto : Tcharly Coutin
