15 C
New York
dimanche, décembre 4, 2022

Fè sèks ak règ, yon pratik ki kouran nan sosyete a moun pa twò renmen pale

Nan koze ki gen rapò ak fè bagay nan dènye tan sa yo gen anpil pratik moun vin pran plezi pale sou yo. Konsa tou gen yon seri lòt ki rete sekrè pou anpil moun alòs yo kouran nan sosyete a men yo toujou pa vle pale sou yo. Se ka pou fè sèks ak yon fi pandan l gen règ li. Passion Info Plus deside leve dra sou dosye sa pou chache konnen kòman yo wè pratik sa nan sosyete a epi kisa medsin di sou sa.

Souvan medam yo deklare yo gen anvi swa lè règ yo pral vini oubyen pral fini. Konsa gen nan yo ki pa rete gade anvi sa yo deside fè bagay ak tout san an, e mesye yo pafwa p ap refize 

Kòman eksperyans la ye ?

Malgre l te santi l mare pou pale sou sa, nou te rankontre Cassandra ki gen 24 lane k ap etidye nan Inivèsite Leta. “Mwen p ap di m toujou fè l. Men souvan lè m gen règ, mwen fè bagay. Depi lè m ap leve mwen te toujou tande anpil moun ap pale sou pratik sa epi yon bon jou mwen deside mande moun ki te avè m lan pou n fè bagay pandan m ak san. Li te renmen m, li te fè l pou fè m plezi menmkan te gen ezitasyon ”, sa jenn demwazèl la rakonte nou.

Fòk nou di sa pa t fini byen pou relasyon Cassandra a. “ Premye eksperyans lan pat mal. Yon lòt fwa mwen mande mennaj mw pou n fè l li te refize epi kòmanse ban m distans jis relasyon an kraze. Aprè sa, chak mwen fè bagay ak règ se ak yon moun diferan.” Koze etidyant lan konfye nou san li pa deside rantre nan detay.

Poutan tout moun pa wè pratik la menm jan. “ Mwen fèl yon fwa deja. Se jis mwen tap karese ak mennaj mwen menm pat dil mwen te gen règ epi se lè nou fin karese bwa l rèd. Mwen te oblije di l sa epi li koumanse plenyen, ak tout sa li kontinye karese m. Aprè li penetre m men règ lan te preske fini ”, Lorie k ap pataje eksperyans li. Genlè sa pat bon vrèman. “ Aaaaa mwen pa te renmen l menm paske li pat dousss. Pou mw, pa gen plezi « feeling » vrèman.” Opinyon demwazèl 21 lane a.

Yon lòt kote, Lorie te fè diferans pou nou ant fè bagay nòmal e ak règ. Pou li, fè sèks nòmal dous anpil men sa ak règ lan gen gou fade.

“ Mwen pa t jwi sa m t ap fè a. Mwen te jis ap satisfè patnè mw an. E se pa yon eksperyans mw swete refè ankò ”, deklarasyon li ki t ap reyaji sou jwisans ki pa genyen.

N ap dakò si medam yo fè l se pa ak pwòp tèt yo. Nou te kwaze ak Erick yon flannè nan vil la ki te deside pataje eksperyans li avèk nou. “ Mwen te fè l yon fwa paske m pa t ka rate posibilite a. Yon demwazèl mwen te vle manje depi lontan men mwen potko jwenn okazyon. Lè m resi jwenn li an li te ak règ e mw te gen pou m deplase nan demen. Li te di m si w rate jodi a mwen pa konn kilè n ap wè ankò ”, jènn gason an k ap bay detay.

“ Sa dwòl men mwen te reziye m fè yon « ke ». Mwen pat menm pran tan pou m kontwole jwisans…jis se sove moman ki te nan tèt mwen. Depi lè sa m pa janm fè bagay sa ankò. ” Koze nou rekeyi nan bouch jenn etidyan, san fyète sou vizaj li. “ Fòk mw di sa, gen anpil « Tòg » deyò a k ap fè bagay sa. Jis yo fek (Fake) yo p ap parèt tout kò yo. Si medam yo ta deside denonse yo, nou t ap wè kouri ki t ap gen nan vil la ”, deklarasyon Erick, vrèman nou te gen anpil difikilte pou n jwenn gason ki pou pataje eksperyans yo avèk nou pandan medam yo di yo « Fè bagay ak règ ».

Pòl negatif mache ak pozitif

Menm jan anpil moun fè l men yo pa pale sou sa, konsa tou gen lòt ki radikal anpil sou lide rantre nan pratik sa.

“ Mwen gen 42 lane, mwen pa janm fè aksyon konsa e pa gen anyen k ap fè m fè l tou. Dayè, lè m gen règ mwen m gen tout pwoblèm ( kè plen, paka manje, tèt vire…). Mwen pa imajine mw menm ki pou t al plimen mete sou li ”, sa yon pwofesyonèl k ap travay nan yon bwat Leta rakonte nou.

Plizyè lòt jenn fi nou te rankontre ale nan menm sans lan men genyen se pa pratik la answa ki pwoblèm yo. Se pito malèz yo genyen nan moman règ la ki pa bay yo tan pou panse ak fè yon aktivite konsa.

Marco se yon jenn gason ki li menm tou derefize tande pale de koze sa. “ Nèg salòp ki fè bagay sa frè. Si m fè l mwen ka fè zonyon tou oubyen manje… ”, fason jènn sa kòmante ak awogans, nan ekspresyon vizaj li fòk nou ta di li anvi bat tout mesye ki lage nan pratik sa.

Kisa Medsin di nan sa? Li bon pou lasante ou pa?

Pou nou wè pi lwen, nou te rantre an kontak ak yon jwenn medsen ki rele Kerry Norbrun k ap bay repons ak anpil kesyon n ap poze tèt nou sou pratik sila. Fòk nou di nouvèl yo pa twò mal. 

Pou dosye ki konsène sèks pandan règ, Lamedsin rekòmande pou w mete kapòt paske risk pou trape yon maladi nan fè bagay pi ogmante akoz kontak dirèk ak san moun lan. Si w fè l ak kapòt li pi bon pou sante w paske si moun nan enfekte ak yon maladi nou ka pran nan san, tankou « VIH oubyen epatit B » nenpòt ti lezyon w genyen nan pati jenital ou ka met san w an kontak ak san moun ki enfekte an e ou ka trape maladi a, selon Doktè Norbrun.

Tout bagay la rete pwoteksyon. Paske si moun k ap fè pratik sa byen pwoteje sa p ap gen okenn konsekans sou sante l. 

Toujou nan fouye pou konnen, nou te poze Doktè Norbrun kesyon sou kisa ki koz fi a anvi fè bagay lè l ak règ li. Men sa li te di nou : “ Fi anvi fè bagay nan peryòd sa yo se akoz chanjman nan sekresyon òmòn yo ( òmòn nan se yon sibstans ki libere e ki aji tankou se yon mesaj k ap transmèt nan san ). Pou fi ki gen règ li se yon je òmonal ki fèt avèk yon bann òmòn tankou « FSH, LH, Pwojestewòn, estwojèn » tanto yo ogmante tanto yo diminye a chak faz nan sik fi an epi chajman sa yo pral aji sou imè fi an. ”

“ Yo konn aji sou anvi fè sèks fi a tou se konsa nou jwenn gen fi se lè y ap ovile yo sou fè sèks, genyen se lè yo gen règ yo anvi. ” se sa doktè a ajoute.

Medam yo itilize anpil fason pou apeze anvi yo. Toujou nan echanj nou te genyen ak Doktè Kerry Norbrun li te konfye nou kisa yon fi ka fè nan moman règ li pou jere anvi li.

“ Metòd ki ta dwe aplike a depann de moun lan. Lesansyèl la se pou moun lan chèche yon bagay pou distrè l e apeze lespri l. Tankou gen fi se tande yo tande mizik, genyen ki gade seri, gen lòt ki di yo konn priye, genyen ki mastibe e konsa tou genyen ki pale sa patnè yo ki asepte yo fè sèks nan peryòd règ la. ” Deklarasyon Doktè a.

Fè bagay pandan peryòd diminye kranp (doulè abdominal), migrèn epi ogmante libido, anplis san an jwe wòl librifyan natirèl nan rapò seksyèl yo.

Men fòk nou pa ekate posibilite pou fi a tonbe ansent tou. Jeneralman gen anpil moun ki di depi fi a fè bagay pendan li gen règ li li p ap ansent. Se manti sin kwè doktè Pia de Reilhac, ki se prezidan Federasyon Nasyonal Kolèj Jinekoloji Medikal e Jinekològ nan Nant(Lafrans) ki fè konnen, daprè “Le journal des femmes” se vre peryòd la lwen ovilasyon an nan tewori men tanzantan ovilasyon an kapab fè defo tou.

Related Articles

1 COMMENTAIRE

LAISSER UN COMMENTAIRE

S'il vous plaît entrez votre commentaire!
S'il vous plaît entrez votre nom ici

Stay Connected

22,878FansJ'aime
3,593SuiveursSuivre
0AbonnésS'abonner
- Advertisement -spot_img

Latest Articles

Toutes Les Dernières Informations Du Monde Avec Passion Info Plus