Ashley Cantave se non yon jèn demwazèl 22 lane ki pèdi lavi l, nan sware madi 12 jiyè a, sou zile Lagonav nan zòn Grandsous ki twouve l nan twazyèm seksyon kominal Ansagalè. Nan moman ensidan an, viktim lan te nan diskisyon ak papa pitit li ki se Coby John Joseph.
Daprè sa PDG la nouvelle la, Charlemagne Deshommes, fè nou konnen, Ashley Cantave genyen yon ti gason 7 mwa ak konsène a. Se manman demwazèl la k ap pran swen pitit la depi kèk tan. Coby John Joseph, ki se papa a, te deside pran pitit la lendi pase a.
Ashley Cantave ki pa kontan ak jès sa chwazi al chache pitit la nan men papa a, yè swa. Eskonbrit te vin pete antre 2 paran yo.
AZÈK zòn nan, Guito André ki te prezan, rale zam li epi tire anlè pou eseye kalme mesye dam yo. Malerezman, pandan l ap desann zam nan yon bal pati e li al pran Ashley Cantave nan vant. Ensidan sila rive devan izin glas ki nan zòn Grandsous la, selon KAZÈK twazyèm seksyon an, Jérémie Lapointe.
Guito André pa touye Ashley Cantave ak tout volonte l, si n ka kwè pawòl KAZÈK la. Men selon reyaksyon plizyè sitwayen, AZÈK Guito André, otè zak la, se yon nonm ki souvan gen alkòl nan tèt li epi ki toujou anvi peze dwèt li sou gachèt zam li ki se yon kalib 9 milimèt.
Guito André ak Coby John Joseph chape poul yo aprè Ashley Cantave fin resevwa bal la, pèsòn pa konnen ki kote yo ye.
“ Ashley Cantave, premye pitit mwen, se espwa tout fanmi an », deklarasyon manman viktim lan, Lonèse Edmond fè ak dlo nan je.
Lonèse Edmond priye otorite polisyè ak jidisyè yo an gras pou mete anba kòd Guito André ki retire lavi pitit fi li.
Fòk nou raple, Coby John Joseph te deja gen yon manda arestasyon dèyè l deja toujou nan kad dosye sila, men otorite lokal ki te okouran pa t fè anyen pou arete l.
