Nan yon konferans pou laprès ki bay jodi lendi 23 janvye 2023 a, estaf antrepriz “I&N Global Services” denonse mesye Milscent Patrick alyas Patrick Tèt Kale, daprè deklarasyon yo, ki ap sal imaj antrepriz la ak yon fo akizasyon l ap mache fè sou rezo sosyal yo. Vann fo viza pou plizyè peyi letranje tankou Meksik, Panama ak Repiblik Dominikèn, fè pati youn nan akizasyon Patrick Milscent yo. Toutfwa, Estaf la pote yon demanti pandan li ap klarifye kijan sa te pase.
Tout estaf la ki te prezan nan konferans pou laprès la estime se manti Patrick ap bay pou l ka jistifye move atitid li te genyen fas ak anplwaye yo epi lefèt li pa vle asepte antrepriz lan tire kòb pa li nan sèvis li te vini pran.
Celestin Daïna, asistant administrativ la eksplike ” Patrick Milscent alyas Patrick Tèt Kale vini pran sevis aplikasyon viza tranzit panama avek viza dominiken. 8 novanm 2022, antrepriz lan resevwa 900 dola ameriken kòm premye vèsman pou viza tranzit panama. 14 novanm 2022, antrepriz lan resevwa dezyèm vèsman sou kont inibank li ki se 1700 dola ameriken. Se nou ki arive fè tout dokiman pou Patrick Milscent, kote li te bay original paspò li epi 2 bout foto idantite. Nou te responsab pou n te fè tranzisyon kat pou li, itinerè, rezèvasyon otèl epi ranpli fòm. Malgré delè nou te ba li, li patka tann li, misye te deside anile dosye a ki te ankou ” .
Antrepriz I&N Global Services ki chita kò l nan delmas 77 te asepte anile dosye Patrick Milscent an a kondisyon l ap touche frè sèvis li te komanse bay. Byenke 1 janvye 2023 Patrick te siyen pou yo ka ranbouse yon montan kise 1800 dola, li te estime li pat jwenn sèvis li te espere a, li pa dakò pou antrepriz lan touche frè sèvis yo.
“M ap telman avili nou sou rezo sosyal” se deklarasyon Patrick Milscent fè pou l jistifye zak malonèt li te fin komèt aprè li te fin fè kont dega epi joure anplwaye yo, toujou sa antrepriz la fè konnen.
Aprè kèk jou, plizyè manm nan estaf la te kòmanse jwenn menas kote yo menase yo yap boule lokal la ak tout moun ki ladan yo.
Akizasyon Patrick Milscent fè sou rezo sosyal yo lakòz plizyè moun pèdi konfyans yo nan kalite sèvis antrepriz la ap bay popilasyon an menm si poko gen moun ki deside pa pran sèvis ankò.
