Yon ti bis Kriswa an movèzeta ki pèdi fren al echwe nan ravin ki nan mòn GOC a, Nazon, lendi 6 mas la. Aksidan sa lakòz sis (6) moun mouri sou plas ak uit (8) lòt blese grav, daprè konsta kowòdonatè Stop Accident, Doktè Jeanty Fils Exalus. Obsèvatè yo pa rate okazyon pou lonje dwèt sou eta ti bis ki fè transpò nan zòn sa.
Sosyete a ap fonksyone bò kote yon pil ak pakèt danje chak jou. Souvan se lè sa dejenere, yo soti pou fè vwa yo pase. Nan sans sa, gen sitwayen ki deklare olye pou ti bis Kriswa yo t ap bay sèvis nan lari a yo te dwe pito nan yon garaj pou reparasyon.
Degradasyon machin trafik an Ayiti toujou reprezante yon sous pwoblèm pou anpil pasaje, jiska rive lakòz lanmò kèk ladann yo, anba je otorite yo. Majorite chofè yo, san enkyetid, toujou ap asire kous yo malgre vye eta machin la twouve l ki souvan gen tout pwoblèm sa yo an menm tan : vye sant luil motè, motè ap fè vye bri, klou ak ap chire rad pasaje, vit sal, kousen depatcha ak vye twal sal. E nou pa bezwen mekanisyen pou imajine kòman motè an twouve l.
Moun k ap kondui machin lan souvan pa konn jere oswa machin lan ap bay sèvis depi plizyè lane. Malgre veyikil sa konn depatcha, chofè an kontinye sèvi ak li paske majorite nan yo estime achte yon lòt machin pa fasil epi pa gen yon Leta k ap di anyen pou machin ki nan men yo a. San bliye, anpil fwa, se travay yo konn bay chofè an travay sou li, kidonk se pa pwopyete prive l, li vini san li pa gen obligasyon pou l ta depanse nan repare l.
Poutan, gen kèk chofè, malgre machin yo an la lontan, yo toujou byen jere l. Fòk nou di, majorite ti bis Kriswa sa yo fè premye aparisyon yo nan lanne 1987 ak 1988 yo.
Leta pa pran pyès dispozisyon konsènan movèzeta machin yo nan lari a ki se youn nan faktè ki lakòz plizyè aksidan pwodui.
Nou tout ka konprann sak voye, nan mòn GOC, 6 sitwayen sa yo nan mòg e 8 lòt twouve yo nan yon eta grav lopital.
