Agence de Service et de Tourisme Dentaire “ASSURDENT” anonse lansman dezyèm edisyon pwogram imanitè li anba tèm “fè l souri” nan lide pou ofri yon ti moso laswenyay nan bouch ak dan bay kèk moun ki vilnerab nan depatman Lwès la. Pwogram sila k ap dire 6 mwa ap komanse 25 dawout pou al bout 25 fevriye 2024. Seyans fòmasyon, retire dan, pwofilaksi, aplikasyon fliyò epi bay kit dantè, se kèk sèvis patisipan yo ap gen chans benefisye.
ASSURDENT ki gen misyon pou amelyore aksè ak konesans epi swen pou bouch, ki deja ofri plizyè sèvis nan klinik prive kou klinik mobil, jije nesesè pou sansiblize pou sante bouch ak dan bò kote moun ki pa ka peye gwo lajan pou l pran swen yo.
Se sa ki rann se nenpòt senksan (500) moun ki repati ant desan (200) pou moun ki soud ak bèbè epi twasan (300) pou timoun ki nan divès òfelina nan Pòtoprens la k ap ka patisipe.
Aktivite sila a ap dewoule sou 6 mwa, sòti 25 dawout ki ap vini la pou l al bout 25 fevriye 2024, se kategori moun sa yo nou site anlè a k ap gen aksè ak plizyè sèvis nan pwogram sila a tankou fòmasyon sou bouch yo, kijan pou yo bwose dan yo, ki enpak maladi bouch ak dan genyen sou kò an jeneral, pwofilaksi, retire dan aplikasyon fliyò, elatriye. Anplis, patisipan yo ap gen posibilite pou benefisye 2 tretman chak 6 mwa.
Pou Doktè Esther Chrysostome, direktris jeneral ASSURDENT, pwogram sila a se yon pwogram patisipatif. Pou li rive fèt, li fè apèl ak moun ki vle ede volontèman. “Donatè yo ka deside konbyen moun yo vle sipòte. Y ap jis fè yon depo pou pi piti mil (1000) goud sou nimewo kont nou nan Sogebank 906-016-670 oswa sou kont moncash nou an”.
Se nan okazyon jounen entènasyonal sante bouch ak dan, 25 fevriye 2024, aktivite a ap bout atravè yon seremoni final ak tout moun ki te benefisye nan pwogram sila a. Direktris jeneral la ap raple tout moun alawonnbadè nesesite pou nou bay bouch ak dan nou bon jan swen epi yon enpòtans patikilye. E gras ak pwogram sila a, li ap yon opòtinite pou moun ki pi vilnerab yo patisipe regilyèman nan konsiltasyon chak ane yo nan lòd yo anpeche enfeksyon nan bouch yo.
