Bouboun nan se yon pati enpòtan nan kò fi a, ki gen pwopriyete inik epi ki mande yon swen apwopriye. Si swen sa pa byen fèt, sa ka antrene pwoblèm tankou enfeksyon epi mennen yon pakèt maladi ki kapab afekte tout kò fi a.
Pale de pran swen kò nou, bouboun nan dwe youn nan priyorite. Kijan pou pran swen bouboun nan pou ka ede kenbe li an sante ? Se youn nan kesyon anpil moun toujou ap poze. Kòman pou kenbe l pwòp, èske li dwe lave aprè sèks ak lòt ankò, se pami kesyon doktè Janvier Dieulor te fè ti bat bouch sou yo ak redaksyon Passion Info Plus la.
Li enpòtan pou n konnen bouboun nan se yon pati nan sistèm repwodiktif fi a. Li se yon kanal miskilè ki konekte matris la ak deyò kò a. Kòm pati natirèl ak nòmal nan kò yon fanm, li jwe yon wòl enpòtan nan relasyon seksyèl ak pandan akouchman. Bon fonksyonman li depann de flò vajinal la.
” Flò vajinal la sitiye nan bouboun nan. Li fèt ak yon seri bon bakteri kò a pwodui natirèlman. Wòl yo se pwoteje yon ekilib nan bouboun nan ant prezans bon bakteri sa yo ak move bakteri yo rele patojèn nan. Lè ekilib sa a konsève, enfeksyon rete lwen bouboun nan. Men se yon ekilib ki frajil epi ki souvan deranje “, eksplikasyon Doktè Janvier Dieulor.
Kisa ki ka deranje ekilib flò sa nan bouboun nan ?
Daprè Doktè an, plizyè faktè kapab gen yon enpak negatif sou ekilib sila a tankou : ijyèn entim ki ensifizan oswa twò agresif,
douch ki enplike netwaye andedan bouboun nan, jèl douch ki gen pafen oswa ki gen alkòl, mete kilòt ki twò sere oswa sentetik ak lòt ankò. Yon lòt kote gen faktè òmonal : chanjman òmonal rive pandan règ, gwosès ak menopoz. Epizòd sa yo febli ekilib flò nan bouboun nan epi yo ka mennen nan enfeksyon.
Dezekilib sa yo nan flò vajinal la gen anpil retonbe. Yo ka lakòz demanjezon, iritasyon, ekoulman nòmal ki diferan ak ekoulman blan klasik oswa menm maladi nan bouboun nan. Lè sentòm sa yo prezan, li enpòtan pou fi a konsilte doktè oswa jinekològ ki pral preskri yon tretman ki apwopriye, sa medsen an konseye.
Ki reflèks ou ta dwe adopte chak jou ak pandan peryòd ou ?
Medsen an fè nou konnen gen yon bon ijyèn entim chak jou esansyèl pou bouboun nan, depi premye peryòd la jiska menopoz. Se pa yon pil bagay, fi a jis bezwen adopte kèk bon abitid.
“ Yon sèl twalèt entim, oswa menm de (2) maksimòm chak jou. Plis nou netwaye, plis nou retire flò vajinal la ki kontribiye nan move ekilib li. Paske bouboun nan gen kapasite poun netwaye tèt li pou kont li. Lave bouboun nan dousman, san gan oswa eponj, vilv la ak klitoris la, san w pa eseye lave anndan kò an ”, eksplikasyon li.
Souvan doktè yo konn rekòmande pou fi yo sèvi ak pwodui ijyèn entim, san pafen, ti sèvyèt entim ak jèl ki fèt espesyalman pou zòn nan bouboun nan. Evite pwodui pafen, douch nan bouboun ak savon paske yo ka deranje ekilib natirèl la nan bouboun lan. Evite itilize pèfizyon, fèy yo preskri sou entènèt paske bouboun nan ka netwaye tèt li, jan nou di l la, toujou daprè Doktè a.
“ Mete kilòt koton, kite yo sèch nan solèy, mete yo sou yon sèvyèt sou bò dwat kilòt yo. Toujou byen lave men w lè w ap mastibe. Pipi ap anpeche posib enfeksyon irinè apre sèks. Li pi bon pou itilize dlo bouyi pou netwayaj pèsonèl elatriye. Sèvyèt ijyenik yo ta dwe chanje 4 a 5 fwa pandan jounen an ”, pawòl li.
Li pa rate okazyon pou raple, bouboun nan gen pwòp flò bakteryen li. Kidonk, detui flò sa p ap benefik. Divès jèn fi alèkile adopte anpil move pratik tankou bouyi jiwòf, oubyen fèy pwa kongo pou sere bouboun yo oubyen itilize vinèg kont enfeksyon. Tout sa yo pa benefik pou bouboun nan.
Bouboun nan ap bay move sant
” Pou moun ki di bouboun yo gen move sant. Odè an ka koze pa enfeksyon tankou vajinoz bakteryèn oswa enfeksyon. Dezekilib omònal sa yo ka rive pandan règ oswa menopoz. Twòp ijyèn entim oswa itilizasyon pwodwi pafen ka deranje ekilib natirèl la nan bouboun lan ”, eksplikasyon Doktè Janvier Dieulor.
Pi lwen, li fè konnen fòk nou pa bliye tou chak fanm gen pwòp odè vajinal li ki ka varye de yon moun a yon lòt. Men, si fi a remake yon chanjman toudenkou nan odè vajen ou oswa si l fè eksperyans gratèl oswa iritasyon, li pi bon pou l konsilte yon pwofesyonèl swen sante pou elimine nenpòt enfeksyon oswa pwoblèm ki kache.
Rejim alimantè
Yon rejim ekilibre jwe yon wòl esansyèl tou nan kenbe balans òmòn ak ankouraje flò vajinal la an sante. Li enpòtan pou fi yo konsome manje ki gen anpil eleman nitritif tankou fwi, legim, epi bwè ase dlo ak limite konsomasyon nan manje transfòme ka ede kenbe bon sante nan vajen. Manje trete oubyen manje transfòme se pwodui yo chanje yo ki vinn bay yon lòt pwodui tankou sosis, “hotdog”…
Li konseye pou fi a koute kò li epi konsilte yon pwofesyonèl swen sante si ta gen enkyetid. Pa egzanp, si fi a remake nenpòt chanjman ki pa nòmal, tankou gratèl, odè oswa doulè.
kredi foto: Kate Bubacz / Via BuzzFeed News
Synda DOLCE
