Giovanni Angelo Becciu se yon kadinal yon tribinal penal nan Vatikan kondane jodi samdi 16 desanm nan pou pase 5 lane ak 6 mwa nan prizon pou krim ki gen pou wè ak lajan.
Daprè jounal ameriken New York times, Giovanni Angelo Becciu se yon gwo bawon nan legliz katolik, pandan plizyè lane li te jwe wòl chèf eta majò pou Pap François. Se Pap la menm ki modifye lalwa Vatikan ki pèmèt yo rive jije kadinal la. Li se premye kadinal ki rive jije nan peyi sa.
Nan kad jijman sa, kadinal Becciu sòti koupab nan fè lajan fè wout kwochi, fwod ak plizyè lòt akizasyon. Non sèlman li gen pou l pase anviwon sis (6) lane nan prizon, yo entèdi l okipe yon pòs nan administrasyon piblik.
Aprè relijye a, gen nèf (9) lòt akize ki te enplike nan dosye sa, toujou pou fwod, detounman lajan, abi fonksyon, blanchiman lajan ak lòt ankò. Dosye a te sitou konsène yon kontra imobilye nan vil Lond, Angletè, kote Vatikan pèdi plizyè milyon Ewo. Tranzaksyon imobilye sa te nan 350 milyon Ewo.
Daprè Fabio Viglione, avoka kadinal Becciu, kliyan li a pral fè apèl dezisyon an paske li inosan, e li p ap ale nan prizon si yo pa tande li.
©️CNS photo/Paul Haring
